KASUR-2


KASUR KARDUS KASUR BATUR
[kinanti]

ngalamun luhureun kasur
ras inget kanu ngaremis
sare dihandapeun sasak
tiris jeung digembrong reungit
dikampuh ku lamak ledak
malah loba nu buligir

inget deui hiji waktu
diajak silaturahmi
ka pasantren di banjaran
rea santri budak leutik
arapal cangkem al quran
barudak jaradi hafidz

sarena patumpuk-tumpuk
ngajepat lir lauk asin
sabab rohangan walurat
ngan sakamer euweuh deui
eta ge imah ajengan
imah leutik jaba heurin

boro-boro make kasur
ngan samak luhureun ubin
sirah henteu dianggelan
harita can boga masjid
ngaji jeung dahar di dinya
kamer jadi ‘multi fungsi’

bet inget ka hadis rosul
cimata merebey bijil
nabi nu kacida mulya
kulemna ge geuning sami
kasurna teh sawut korma
tapakna ngagurat damis

urang kiwari can tangtu
kasur hipu ati tingtrim
nu aya guling gasahan
sok sieun datang pulisi
atawa jaksa ‘ka-pe-ka’
ngadakwa nuduh korupsi

harga kasur ratus rewu
nu ngajuta teu saeutik
di beuli ku dasar ria
gengsi tur hayang kapuji
dijabel ku nu ngajual
teu kuat mayar kiridit

kasur murah oge cukup
tibra sare beurang peuting
teu kudu mikiran hutang
asal genah hade ngimpi
rarasan di istana
hudang sare bisa seuri

nya atuh mun urang mampuh
wajar meureun lamun meuli
harga kasur nu jutaan
tapi sarena teh geuning
dina korsi kaleosan
ngaguher hareupeun tipi

kasur mun dipikir jauh
eta ni’mat ti ilahi
keur sare supaya genah
ngan sing inget ka nu leutik
rea jalma nu sangsara
kasur kardus hateup langit


skmi – 30112011
by Mang Jojo on Wednesday, November 30, 2011 at 4:49pm

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s