LALAMUNAN MURANGKALIH


HOYONG DISEPITAN
[kinanti]

rerencangan tos tipayun
disepitana tos lami
ari abdi mah teu acan
dupi anu janten margi
sepuh can gaduh artosna
ma’lum damelna mung kuli

abdi hoyong tikapungkur
tapi dugi ka kiwari
cita-cita can laksana
abdi teh sok lungas lengis
ku pun biang diusapan
anjeuna nyurucud nangis

kacipta dirubung–rubung
memeh di sepitan enjing
ditaekeun kana kuda
gek tumpak terus nguruling
diabring abring ka jalan
dipirig ku angklung buncis

acuk saten mani hurung
kopeh hideung pa iming
poletna endat endatan
koneng emas nu nyiripit
sapatu can ngagaduhan
mung aya ge sendal capit

disawer kawih halimpu
kedah calik dina korsi
ngupingkeun rupi piwejang
tapi teu ngartos sapalih
ti dinya mah teras unggah
sadaya lebet ka bumi

gule sate tur kukumbu
bakakak tur goreng ati
gurame oge haranjat
lauk kancra meunang mais
brak tatamu taruang
kuring nempokeun di pipir

enjing enjing rebun-rebun
panganten ngumbe di cai
maksadna supaya baal
disepitan hentue nyeri
tidinya teras dicandak
calik dilahun na korsi

nu ningali teh ngarariung
jep jelma teh mani jempling
paraji muka pakakas
anjeuna nyandak panyapit
peso seukeut anu herang
preng teh teu langkung sadetik

diawur obat puruluk
nu raheut sina bersih
ti dinya di beubeur tapas
hahalang ambeh teu nyeri
sarung anu ngagesekan
da moal karasa peurih

artos panyecep teh ngumpul
diwadahan jolang alit
bakakak oge ngabarak
kueh panganten aramis
disanding nu ngabeberah
nya eta kacapi suling

tos saminggu mah humapur
tawis raheut sae deui
ayeuna teu inggis lumpat
tos tiasa ameng deui
tapi nya atuh iraha
lalamunan teh ngajadi


skmi 14102011
by Mang Jojo on Friday, October 14, 2011 at 5:00pm

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s