HEUBEUL ISUK


HEUBEUL ISUK
[asmarandana]

ngumbara kuring teh kungsi
di kacamantan soreang
di jalan raya ciwidey
imah teh dina mumunggang
handapeun tangkal kiara
ngaran lembur heubeul isuk
katelah beurang sok elat

tiris keneh enjing-enjing
sareng langit henteu bengras
teu katingal sarangenge
reueuk sanes bade hujan
awun-awun ngahalangan
jarum jam tos angka tujuh
tapi geuningan can caang

kiwari mah lain deui
heubeul isuk di mamana
sarangenge teu meletek
cahaya datangna ‘bias’
kota teh jadi biasa
diharudum ku halimun
caangna teh henteu lila

mun nengetkeun pola iklim
ayeuna jadi barobah
beda deui jeung bareto
halodo diganti hujan
selangna teh genep bulan
ayeuna asa teu puguh
hujan halodo teu jelas

di nu sejen cenah banjir
cai laut oge limpas
ka darat nu disebut rob
basisir teh kacaahan
gunung es angkleung angkleungan
kitu bejana di kutub
di kidul nu kapanasan

beja deui kutub magnit
di kaler bumi ayana
ayeuna teh geus ngageser
tilulima mil jauhna
duka naon akibatna
nu bodo mah kalah bingung
da hese mikiranana

sadaya pangersa gusti
anu murbeng ieu alam
ngatur miara malire
urang darma wawayangan
taya daya jeung upaya
tapi tadabur mah kudu
supaya urang wapada

waspada mangsa kumelip
ngumbara di alam dunya
poma kade ulah poho
sing suhud kana ibadah
niat unggal paripolah
ditujukeun ka nu agung
Allah anu maha welas


skmi – 25012011

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s