ULAH LEEH


ULAH LEEH
[asmarandana]

karasa jaman kiwari
alam teh siga muriang
nagara kabeh hareeng
siga orok anu ‘indah’
keur puber lamun rumaja
postpower mun tos sepuh
pancaroba anu motah

hujan banjir reujeung lini
gunung bitu caah lahar
langit ceudeum unggal poe
mangsa teh leupas pranata
beda deui jeung baheula
lingkungan beuki teu puguh
pajuriwet ku masalah

tapi keur jalma nu ngarti
metakeun akal pikiran
tur dibentengan ku hate
tangtuna moal gareuwah
komo jeung aral subaha
tenang jeung tetep saruhud
dibarung sikep waspada

sanajan keur jalma leutik
komo deui anu beunta
lolongkrang teh aya keneh
ku ihtiar nu daria
dibarung tetep ngadunga
ngalakonan hirup kumbuh
teu leeh ku loba susah

loba keneh jalma miskin
tapi nu beunghar ge nambah
hirup teh siga nu emet
paheula-heula lalumpat
paburu-buru udagan
pirajeunan silih siku
nu sieun teu kabagean

tapi lamun urang yakin
kahareup urang teh bagja
ulah arek eleh geleng
ku bangsa batur nu lian
ku musuh jeung babaturan
unggal jalma boga punjul
saban bangsa hayang jaya

anu doilim bakal nyingkir
nu nandasa pek palastra
mun waktuna datang tempo
digilirkeun ku pangeran
da kudu kitu kudratna
roda muter dina purus
digoeng ku nu gaduhna


skmi – 18012011

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s