KOLOTEUN KOKOLOTEUN


NYINGKAH KOKOLOTEUN
[asmarandana]

sanes mamatahan meri
anu tos palinter ngojay
etang etang heureuy bae
panyingray rerepet manah
sugan aya mangpaatna
sukur-sukur mun kapuluk
janten pangajaran urang

ieu mah perkawis kulit
nu macemna lima rupa
utamana di awewe
hususna mah dina raray
lawang jeung gapura urang
mun gok amprok sareng batur
pateuteup sareng panutan

saha anu teu kataji
ningal pameunteu nu mencrang
semu kayas jambu aer
sapertos siti aisah
khumaeroh katelahna
muhun eta garwa rasul
putri sayid abubakar

masalahna dina kulit
lila lila sok meotan
da umur teh beuki kolot
tapi hayang awet ngora
sanajan huis geus rampak
kusabab era ku batur
lamun gaul jeung nu ngora

ngamuhit ku ’anti aging’
kokoloteun dihalangan
ngadahar kapsul jeung tablet
di ’masase’ unggal bulan
wedak nu pang mahalna
salian ’pemutih kulit’
’suplemen’ ge teu kaliwat

ciri-ciri macem kulit
ka hiji disebut normal
osok tumuwuh ’komedo’
lamun umur masih ngora
mangsana urang rumaja
mun dicabak pasti hipu
di jawil ge raos geunyal

tapi pami lami-lami
yuswa tos tilu limaan
janten robih ulah helok
sakedik aya bentena
’pori-pori’ ge katingal
gigireun panon ge kerut
tapi teu kedah hariwang

nu kadua ’jenis kulit’
eta teh seueur minyakan
ngagurilap na zona te’
irung gado reujeung tarang
‘pori-pori’ ngalegaan
basa inggrisna ‘grisi skin
tapi eta teu kacida

normal tapi ‘clinically
grisi skin’ rea jarawat
sakapeung sok ngajarendol
tapi ulah dikoetan
antepkeun tapi ubaran
taros ahlina nu weruh
bilih bisi kumaonam

nu katilu kulit garing
maleukmeuk teu ngagurilap
sakapeung mah rada kendor
mun di cabak rada kasar
pori-pori teu baradag
karinyut di deukeut irung
atawa di deukeut mata

nu kaopat kombinasi
antara garing jeung minyak
antara pipi jeung gado
katingalna teh sok herang
kitu deui dina tarang
pipi gado teh zona ‘U’
istilah tukang diwedak

pamungkas kulit sensitip
kade ulah lalawora
margi gampil janten awon
ateul panas sok ngaheab
opat macem panyabna
kahiji rea kabingung
atawa robah ’cuaca’

kadua mun hawa tiris
angin jeung ’ac’ ruangan
sisit kulit sok naronghol
garing puleuk ranyed pisan
estuning teu cahayaan
singkahan nu model kitu
tapi teu kedah gareuwah

katilu mah sanes deui
lamun make sabun anyar
kosmetik nembe dianggo
kulit beureum jadi panas
rarasaan teh karerab
siga nu alergi kitu
duka tah naon margina

nu kalima marga haid
nyaeta kasereseban
pami teu acan ’menopos’
nu ieu kedah tamaha
da eta kodrat wanita
aya hikmah atos tangtu
‘regulasi’ ti pangeran


[hanca]
skmi-salasa 05102110

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s