Para wargi kalih tamu anu sarumping.
Salam kawilujengan kahaturkeun.
Assalamu ‘alaikum wr.wb.
Teu kinten ngaraos bingah rehna saderek parantos kersa sindang. Salam pangwanoh kapiunjuk.
Sim kuring wasta teh Jojo S. Natasuarna. Kawit mah ti Ciomas Panjalu Ciamis, ayeuna dumuk di Bandung. Bojo hiji, budak dua sajodo. Kantos ngumbara di Pontianak Kalimantan Barat, di Soreang Bandung, di Kupang Nusa Tenggara Timur, sareng di Klungkung Bali, dina raraga 35 taun laku gawe di PT TELKOM. Kiwari tos mangsana reureuh mayunan pangsiun.
Bilih aya nu panasaran kunaon wasta dipondokeun janten Mang Jojo, alesan mah kahiji mang atawa emang teh sebutan urang keur adi indung atawa adi bapa, ciri deukeut; kitu deui kecap mang teh sok dipake ku urang lamun nyalukan atawa nyebut hiji jalma lalaki dewasa anu masih keneh belejag sarta dipikawanoh jeung karasana deukeut kana hate urang. Atuh alesan sejena mah kuring oge ti keur budak teh sok disebut Mang Jojo ku pun alo.
Perkawis pupuh sim kuring sanes mandahna kana kurung-karang, maksakeun soteh bakat ku hoyong diajar pupuh tutungkusan karuhun, warisan urang sunda baheula. Sok sanaos umur mah tos tunggang gunung cueut ka hareup / langkung ti limapuluh, tapi da diajar mah masih keneh kabita kunu ngarora.
Mangga urang diajar ngalalanyahan guguritan, bari ngahariring ngalenyepan pakarepan bihari-kamari; ayeuna – kiwari; isuk jaganing geto…
Bilih hoyong ngobrol kapapanjangan mangga lebet bae ka : facebook.com/mangjojo
Hatur nuhun
Mang Jojo
Wilujeng tepang Mang.
Punten ah ngiring kutrat-kotret di dieu. Pamaksadan mah mudah-mudahan wae tiasa janten jalan kanggo manjangkeun babarayaan sanaos ngalangkungan dunya blog.
Nuhun, Sakitu ti simkuring
rampes, wilujeng den ciburuan. hatrur nuhun parantos kersa sindang. pangwanohna katampi pisan paugi janten kasaeaan kanggo urang sadaya. sihapunten blogna awon, komo eusina mah seueur kakirangan,; dipindo hatur nuhun.
Punten abdi teh parantos ngaguar sakedik perkawis blog Amang jenten seratan di blog abdi,mangjojo Diajar Pupuh. Maksad wawartos teh bilih aya anu lepat diseratna.
Nuhun..
hatur nuhun tos kersa nyeumatkeun blog ieu kana panumbu blog pangersa; narasina cekap, sae. mangga urang sami sami silih simbeuhan ku kanyaah miara basa sunda. dipindo hatur nuhun.
muhun, Mang
Sawalerna
Assalamu’alaikum wr wb. Tah geuning, aya situs spesial pupuh mang Jojo. Ngiring Bingah, insyaallah barokah, seueur mangpaatna. Aamiin YRA
Wa ‘alaikumussalam wr wb. Hatur nuhun Bu Ina, parantos kersa sumping ngalongok ka dieu. Pamugi piduana diijabah ku Allah SWT. Amin ya robbal ‘alamin.